😳നോഹ നീതിമാനും തന്റെ തലമുറയിൽ നിഷ്കളങ്കനുമായിരുന്നു; നോഹ ദൈവത്തോടുകൂടെ നടന്നു. ഉല്പത്തി6 :9

😳യഹോവ സാത്താനോടു: എന്റെ ദാസനായ ഇയ്യോബിന്മേൽ നീ ദൃഷ്ടിവെച്ചുവോ? അവനെപ്പോലെ നിഷ്കളങ്കനും നേരുള്ളവനും ദൈവഭക്തനും ദോഷം വിട്ടകലുന്നവനും ഭൂമിയിൽ ആരും ഇല്ലല്ലോ. ഇയ്യോബ്1 : 8

😳ശലോമോൻ വയോധികനായപ്പോൾ ഭാര്യമാർ അവന്റെ ഹൃദയത്തെ അന്യദേവന്മാരിലേക്കു വശീകരിച്ചു; അവന്റെ ഹൃദയം അവന്റെ അപ്പനായ ദാവീദിന്റെ ഹൃദയംപോലെ തന്റെ ദൈവമായ യഹോവയിങ്കൽ ഏകാഗ്രമായിരുന്നില്ല. 1രാജാക്കന്മാർ 11 :4

😳ആസയുടെ ഹൃദയം അവന്റെ ജീവകാലത്തൊക്കെയും യഹോവയിങ്കൽ ഏകാഗ്രമായിരുന്നു. 1രാജാക്കന്മാർ15 :14

മുകളിൽ നോഹ, ഇയ്യോബ് ,ദാവീദ് , ആസ , ഈ നാല് പേരെക്കുറിച്ച്‌ പറയുന്നുണ്ട്. ഈ നാലുപേരെയും കുറിച്ച് പരിശുദ്ധാത്മാവ് സാക്ഷ്യപ്പെടുത്തുന്നത് ഇവർ ദൈവമുൻപാകെ പൂർണ്ണ മനുഷ്യർ ആയിരുന്നെന്നാണ്.അവർ ദൈവത്തിന്റെ മുൻപിൽ പൂർണ്ണ ഹൃദയം ഉള്ളവരായിരുന്നു. അപ്പോൾ തന്നെ വചനം വ്യക്തമായി പറയുന്നു അവർ പൂർണ്ണമായിട്ടും പാപം ചെയ്യാത്തവർ ആയിരുന്നില്ല എന്നും . എങ്കിലും അവർ ദൈവമുൻപാകെ പൂർണ്ണത ഉള്ളവർ ആയിരുന്നു.

നമ്മുക്ക് അറിയാം....... നോഹ എങ്ങനെ വീണു എന്നും , ഇയ്യോബ് എത്ര വിനയത്തോടെ ദൈവത്തിന്റെ മുൻപിൽ നിന്നെന്നും , ദാവീദ് എപ്രകാരം പാപം ചെയിതു എന്നും , ആസാ രാജാവ് അന്യദൈവങ്ങളെ ആശ്രയിച്ചതും എല്ലാം ......... എന്നിട്ടും ഇവരെ എല്ലാം ദൈവം പൂർണ്ണ ഹൃദയം ഉള്ളവരായി കണ്ടു.

ഇതു വായിക്കുമ്പോൾ നമ്മൾ ഒരു കാര്യം മനസ്സിലാക്കണം ദൈവത്തിന്റെ മുൻപിൽ പൂർണ്ണത എന്ന് പറയുന്നത് ആ വ്യക്തി കടന്നു പോകുന്ന സാഹചര്യത്തെ വിലയിരുത്തി ആണ്.ദൈവം ആ വ്യക്തിയെ ശോധന ചെയിതു കാര്യങ്ങൾ ഓരോന്നോരോന്നായി പഠിപ്പിച്ചു ദൈവഹിതപ്രകാരം കൊണ്ടുവന്നു ദൈവത്തിനു പൂർണ്ണഹൃദയം ഉള്ളവർ ആക്കി തീർക്കുന്നു.

ഇതാണ് നാം ഓരോരുത്തരും മനസ്സിലാക്കേണ്ടത്. പുറമെ നോക്കി ഓരോരുത്തരെയും കുറ്റം പറഞ്ഞു നടക്കുന്ന പ്രവണത നാം ആദ്യം മാറ്റണം . നമ്മുടെ ചിന്തകൾക്കും പഠിപ്പീരുകൾക്കും അതീതമാണ് ദൈവത്തിന്റെ കാഴ്ചപ്പാട്. നാം ചെയ്യേണ്ടത് ഒരുവന് നേരായമാർഗ്ഗം പറഞ്ഞു കൊടുക്കുക.ബാക്കി ദൈവം നോക്കിക്കൊള്ളും.

ഒരു ചെറിയകുട്ടിക്കു തന്റെ മാതാപിതാക്കൾ , അല്ലെങ്കിൽ അധ്യാപകർ പൂർണ്ണരായി തോന്നാം.എന്നാൽ ഈ കുട്ടി വളർന്നു കഴിയുമ്പോൾ തന്റെ മുൻപേയുള്ള കാഴ്ചപ്പാടിൽ മാറ്റം വരുത്തുവാൻ സാധ്യതയുണ്ട്. ആദ്യം പൂർണ്ണരായി തനിക്കു തോന്നിയവർ ഒന്നും പിന്നീട് പൂർണ്ണരായി തോന്നണം എന്നില്ല . പൂർണ്ണത എന്ന് പറയുന്നത് ദൈവം ഏതു സാഹചര്യത്തിൽ ആണ് ഒരു വ്യക്തിയെ കൊണ്ട് പോകുക അതിനെ ആസ്പദം ആക്കിയിരിക്കും ആ വ്യക്തിയുടെ പൂർണ്ണത. ന്യായപ്രമാണത്തിൽ ഒന്നും തന്നെ പൂർണ്ണമല്ലായിരുന്നു എന്നാൽ യേശുക്രിസ്തുവിലൂടെ ആ പൂർണ്ണത ദൈവം നമ്മുക്ക് വെളിപ്പെടുത്തി തരുകയും ചെയിതു . ഇനി ആ പൂർണതയിലേക്ക് നമ്മെ നടത്തുവാൻ യേശുക്രിസ്തു മതിയായവൻ ആണ്. യേശുക്രിസ്തു ആണ് നമ്മുക്ക് മാതൃക.

പുതിയനിയമത്തിലെ പൂർണ്ണത പഴയനീയമത്തിലെ പൂർണ്ണതയെക്കാളും വളരെ ശ്രേഷ്ഠവും ഉന്നതവും ആണ്.നമ്മുടെ ഹൃദയത്തിലെ ചിന്തകളെ അളന്നു നോക്കി ഹൃദയത്തെ നിരൂപിക്കുന്ന ദൈവം ആണ് നമ്മുടെ ദൈവം . നമ്മുടെ ഹൃദയത്തിലൂടെ കടന്നു പോകുന്ന ഓരോ ചിന്തകളെയും അവൻ കാണുന്നു .നമ്മുടെ ഹൃദയത്തെ ആണ് ദൈവം നോക്കുന്നത് . അല്ലാതെ പുറമെയുള്ള യാതൊന്നിനെയും ദൈവം നോക്കുന്നില്ല . പുറമെ വെണ്മകാണിച്ചു ഹൃദയത്തിൽ കാപട്യം കാണിച്ചു നടക്കുന്നതുകൊണ്ട് എന്ത് പ്രയോജനം ! .

ദൈവമുൻപാകെ പൂര്ണഹൃദയമുള്ളവനാണെങ്കിൽ മാത്രമേ ദൈവത്തിനു പൂർണ്ണൻ ആകുകയുള്ളൂ . ഈ ഭൂമിയിൽ ആയിരിക്കുമ്പോൾ നമ്മുക്ക് ഒന്നേ ചെയ്യുവാൻ കഴിയുകയുള്ളൂ ......മറ്റുള്ളവരുടെമേൽ ദൃഷ്ടിവെച്ചു അവരെ ന്യായം വിധിച്ചു കൊണ്ട് നടക്കാതെ നമ്മെ പൂർണ്ണമായി ദൈവമുൻപാകെ സമർപ്പിക്കുക . തന്റെ സകല ഇഷ്ടങ്ങളും ദൈവഹിതത്തിനു സമർപ്പിക്കുന്ന ഒരു മനുഷ്യന്റെ ഹൃദയം അത് പഴയനീയമത്തിൽ ആണെങ്കിലും പുതിയനീയമത്തിൽ ആണെങ്കിലും ഒരു പൂർണ്ണമനുഷ്യനായി ദൈവം കണക്കിട്ടു. വചനത്തിൽ ഉടനീളം ഇപ്രകാരം പൂർണഹൃദയത്തോടെ ജീവിച്ച അനേകം ഭക്തന്മാരെ നമ്മുക്ക് കാണുവാൻ സാധിക്കും . ഇവരാണ് യഥാർത്ഥത്തിൽ ദൈവത്തിന്റെ മഹിമകണ്ട സാക്ഷികൾ.

ഇന്ന് ദൈവം നമ്മോടു ചോദിക്കുന്നത് മറ്റൊന്നുമല്ല .. ''നിന്റെ ഹൃദയം എനിക്ക് തരിക''

ഇന്ന് നമ്മുക്ക് കൊടുക്കുവാൻ സാധിക്കുമോ നമ്മുടെ ഹൃദയം പൂർണ്ണമായി ദൈവത്തിനു ?

ദൈവത്തിനു പൂര്ണഹൃദയത്തെ നൽകുവാൻ തയ്യാറുള്ളൻ ദൈവത്തിന്റെ മുൻപിൽ പൂർണ്ണമനുഷ്യൻ ആയിരിക്കും.അപ്രകാരം ഉള്ള വ്യക്തികൾ പൂർണ്ണമായിട്ടും ദൈവത്തിന്റെ പദ്ധതിക്ക് വിധേയപ്പെട്ടു തന്റെ സ്വായത്വത്തെ മറന്നു സകലതും ദൈവ ഇഷ്ടത്തിനുവേണ്ടി പ്രവർത്തിക്കുന്നവർ ആകും.

ഒരു പൂർണ്ണ ഹൃദയമുള്ളവൻ താൻ ചെയ്യുന്ന സകലതും പൂർണ്ണസന്തോഷത്തോടും സ്നേഹത്തോടും ആയിരിക്കും . പിറുപിറുപ്പോ നിലവിളിയോ അവർക്കില്ല .അവരുടെ നിലവിളി ദൈവമുപാകെ മാത്രം ആയിരിക്കും. അങ്ങനെയുള്ളവർക്ക് ദൈവം തന്റെ ശക്തിയെ അയച്ചു ബലപ്പെടുത്തുകയും അവർക്കു വേണ്ടത് ഒരുക്കി കൊടുക്കുകയും ചെയ്യും. അങ്ങനെ അവർ ദൈവത്തിന്റെ പൂർണ്ണഹിതപ്രകാരം ജീവിക്കുകയും പ്രവർത്തിക്കുകയും ചെയ്യും.

പ്രീയ സഹോദരങ്ങളെ നമ്മുക്കും നമ്മുടെ ഹൃദയങ്ങളെ പൂർണ്ണമായും ദൈവത്തിനു വിട്ടുകൊടുക്കാo . നമ്മുടെ ഹൃദയത്തെ നാം കൊടുക്കുമ്പോൾ ദൈവം നമ്മുടെ ഹൃദയത്തെ തന്റെ ഹൃദയത്തിന് അനുരൂപമാക്കി മാറ്റും.ഇനിയുള്ള നമ്മുടെ പ്രാർത്ഥനയും വിശ്വാസവും ആഗ്രഹവും എല്ലാം അങ്ങനെയുള്ള ഒരു ഹൃദയത്തിന് വേണ്ടി ആയിരിക്കണം .അപ്പോൾ നമ്മളെ നോക്കി ദൈവം പറയും
''ഇതാ എന്റെ ഹൃദയപ്രകാരം ഉള്ള മകൻ അല്ലെങ്കിൽ മകൾ'' ഇതായിരിക്കട്ടെ നമ്മുടെ ഓരോരുത്തരുടെയും ലക്ഷ്യം.

ഇതിനായി ദൈവം നമ്മളെ ഓരോരുത്തരെയും എടുത്തു ഉപയോഗിക്കട്ടെ.

സ്നേഹത്തോടെ
സുമാ സജി